事源，我將要獨力煮一餐家常廣東菜，為免為害人家肚子!
特別邀請殷家兩位大廚親自傳綬殷家絕學
連煎餃子和炒飯都可以失敗的細佬都說要來一起學呢!
『豆腐潤』咁大的廚房塞滿一家四口...好熱哦!!!!
前晚玩至凌晨5時多，晨咁早8時起床，嗚嗚..
先到吉吉島買韓國粉絲，11時左右再與媽媽大人到紅磡買餸!
‧‧‧是日菜單‧‧‧
1. 南北杏雪耳木瓜豬蹍湯
2.蝦醬通菜
3.粉絲蒸蒜辣大蝦
4.薑蔥炒蟹
5.蒸魚
6.蠔油炆冬菇鴨掌
南北杏雪耳木瓜豬蹍湯
先煲好湯~!
材料:
1.木瓜一個
2.20蚊豬蹍
3.雪耳10粒
4.蜜棗3粒
5.南北杏(一隻手掌份量)
6.茨實(一湯匙份量)
做法:
1. 豬蹍洗淨汆水
2. 早一晚先浸至發大的雪耳，汆水
3.木瓜洗淨去皮去囊、切大塊
4.蜜棗、南北杏、茨實洗淨
5. 將6大湯碗水煲滾，掉哂所有湯料落去!!! 大火煲滾15分鐘
6. 轉為細火煲3個鐘，落適量鹽調味即成。
易煲又健康!!
木瓜可幫助消化、抗菌解熱；南北杏止咳潤肺，雪耳則能滋陰潤肺、養胃生津。
蝦醬通菜
材料:
1.通菜一斤
2.指天椒3隻
3.蝦醬1大湯匙
4.糖適量(視乎你食得咸唔咸啦!)
1.通菜浸水半小時洗淨，莖上摘開三段
(太陽很猛，我想在廚房應該要先塗防曬!!!)
2.指天椒開半去囊、切粒
個人很喜歡用指天椒，除了令餸菜顏色更靚，用來炒更加惹味!!!
3.燒熱鑊下油兩湯匙，落下通菜大火快手兜住炒!
4.蝦醬加水、糖及指天椒粒，落下炒至菜呈軟身即成。
粉絲蒸蒜辣大蝦
特別用了韓國粗粉絲，比平日的粉絲更有咬口!
材料:
1.花竹蝦 8隻 (打平切半，蝦不要選太細隻哦!!)
2.蒜頭---8瓣 (用刀大力拍扁切碎粒)
3.指天椒---8隻(去囊切絲)
4.韓國粗粉絲 ---1束、約半包左右 (吉吉島索價$20大元一包!!!可惡!)
5.蔥---1棵（切幼絲）
醃料:
胡椒粉 ---1/4 茶匙
鷹粟粉---1 湯匙
生抽---1 湯匙
調味料:
麻油---1/4 茶匙
鹽---1/4 茶匙
砂糖---2/3 茶匙
紹興酒---1湯匙
做法：
1. 將粉絲用滾水煮熟, 用凍水過冷河後, 隔水備用
2. 將大蝦洗淨, 去頭, 剪去長腳及長鬚, 打平切半後, 加入醃料撈勻, 鋪上粉絲上備用
3. 將蒜蓉粒, 指天椒粒, 薑蓉, 鹽, 砂糖, 紹興酒及麻油攪勻, 鋪上大蝦上
4. 用大火隔水蒸10分鐘後, 灑上蔥粒, 最後淋上兩湯匙滾油, 即成。
薑蔥炒蟹
可憐的蟹蟹和魚...
材料：
1.花蟹兩隻 (約一斤)
2.薑半個 (切薄薄薄片，因為較入味!)
3.蔥 (切大大段。老豆指明要大量!!! 至少兩大棵!....喂! 你個女唔食蔥喎!)
4.乾蔥頭數粒 (一開二)
5.指天椒5隻 (去囊切粒)
芡汁：
1.清水半碗
2.生抽1湯匙
3.蠔油 2湯匙
4.白酒1湯匙
5.糖1茶匙
開始劏蟹...嘿嘿! 薑蔥炒蟹---我老豆拿手絕學!
由於殷大廚話我『姐手姐腳』.....就一腳『申』開我!
之後由佢表演!!
無影手極速劏蟹連環圖 ，同場加影殷大廚玉手一雙
(快到無影....所以影唔到囉!)
劏蟹步驟:1.先斬蟹鉗! 蟹鉗用刀面拍一拍爛，方便煮熟後容易食!
(小心唔好整斷條水草...唔係隻蟹就會大暴走!)
==變態實況==
殷大廚 : 那! 大力斬蟹鉗先! 斷左佢手筋腳筋! 之後任你點玩都得啦!
我 : 咁咁咁咁變態!!!???
殷大廚 : 哦!!!! 你食佢就唔變態! 我劏佢就變態????
我 : .........(又有道理既!)
劏蟹步驟2. :拉開蟹底的"奄"，再用刀尖一撬，便很容易分開蟹蓋和蟹身了。
劏蟹步驟3.:蟹身中間大力一斬，分為兩半，徹底清洗乾淨。
蟹蟹即時魂歸天國，壯烈犧牲。
劏蟹步驟4. :將兩邊蟹腮、蟹蓋的口部切走。所有蟹件瀝乾水份。
因為蟹腮、蟹的口部非常寒涼! 唔可以食!
做法:
1. 蟹蓋、蟹件沾上生粉以防蟹羔跌下。
2. 燒熱鑊下油3大湯匙，放下薑片走油! (游兩下就可以拎番上黎先，備用)
3. 先放蟹蓋、接著蟹件半煎炸，目的是固定沾了生粉的部份，最後才放下蟹鉗。
4. 隔一會，加入芡汁炒炒炒，炒1分鐘左右蓋上鍋蓋焗一會。
5. 加入蔥段薑片一起炒，再加入半碗生粉水炒3分鐘至乾身，蓋上鍋蓋焗一會即成。
==變態實況==
我: 喂! 個鑊出煙啦! 仲唔落野???
殷大廚 : 未得呀!
我: 唔係喎! 好大煙啦! 落啦!!
殷大廚 : 就得啦! 夠熱先夠鑊氣嘛!
我: 下!! ......燒著啦! 老豆!!!!!
記得小時候曾有一次 殷大廚表演『超級豉椒炒蜆』
全屋即時變成大酒樓廚房.....油煙四散、彷如身在火場一樣....
味道刺鼻攻眼，細佬、媽媽同我即時要跑出走廊避難
殷大廚煮到要用毛巾掩鼻.....雖然味道真的不錯
但可不可能用普通一點的方法來煮呢????
======================
我 : 加完芡要焗幾耐呀?
殷大廚 : 一陣。
我 : 咁加完生粉水炒完又要焗幾耐呀?
殷大廚 : 好快。
我: ........... 咁即係幾耐姐???? -_-!!
蒸魚
材料：
1. 魚1條
2. 蔥一棵 (蔥段蒸時候用) + (切絲蒸熟後用)
3. 薑一厚片
做法:
1. 可叫魚販劏好，回家再把魚洗淨，有時候魚販有點求其，便要檢查魚鱗有否打乾淨!
2. 剪掉肚內兩旁白色薄膜(因為有苦味!)，剪掉背鰭，魚鰭等等。
(我不小心把背鰭剪得太深...露了白色的肉出來! 哈哈哈)
3.放薑、幾根蔥段在魚下，隔水蒸7分鐘。(時間在乎魚大小和碟的厚薄)
4.最後灑上蔥絲， 淋上蒸魚豉油和兩湯匙滾油, 即成。
登凳! 四餸一湯，白飯任裝!!!!
最後大獲好評，通通吃光!
由於老豆和細佬晚上有約，夜晚和媽媽二人再炆鴨掌!
蠔油炆冬菇鴨掌
材料：
1. 鴨掌7隻
2.冬菇15隻 (開半)
3. 乾蔥1粒 (切4份)
4. 薑 數片
5. 蒜頭 (切開邊4粒)
芡汁:
1. 蠔油 2湯匙
2. 豉油1茶匙
3. 糖1茶匙
4. 雞粉1茶匙
5. 紹興酒1茶匙
6. 水大半碗
1. 早一晚先浸軟冬菇，去莖。
2. 瀝乾水加加入糖2茶匙、生粉1茶匙、1茶匙油拌勻，隔水蒸半小時。
3. 洗淨鴨掌，切去腳指甲
4. 燒熱鑊下油，爆香薑片、乾蔥、蒜頭
5. 加入鴨掌、冬菇 (連蒸完後的水!! 這是精華所在哦!)、芡汁炒香
6. 滾起後改慢火炆半個鐘即成。 (可以用筷子試一下淋唔淋!)
